धनकुटामा भिषण हमला
पन्ध्र सैनिकसहित २८ सुरक्षाकर्मी बेपत्ता, दुवैतर्फठूलो हताहतीको आशंका
सशस्त्र माओवादी छापामारले गएराति धनकुटा बजारमा आक्रमण गरेको समाचार छ । राति पौने नौ बजे धनकुटा बसपार्कस्थित विद्युत् प्राधिकरणको सबस्टेसनमा शक्तिशाली बम विस्फोट गर्राई आक्रमण सुरु गरेका माओवादीले धनकुटास्थित सम्पूर्ण सरकारी कार्यालय ध्वस्त बनाएको समाचार छ । सुरक्षा निकायमा समेत आक्रमण गरेका माओवादीसँग राति अबेरसम्म दोहोरो भिडन्त भएको छ ।
चुली वन क्षेत्रबाट हजारौंको संख्यामा धनकुटा बजार प्रवेश गरेका माओवादीले विद्युत् अवरुद्ध गरी आक्रमण सुरु गरेको बताइएको छ । जिल्ला प्रहरी कार्यालय र सैनिक ब्यारेकमा माओवादीले आक्रमण केन्द्रित गरेको र यो समाचार तयार पार्दासम्म एक सैनिकको घटनास्थलमा शव भेटिएको, १३ प्रहरी र १५ सैनिक सम्पर्कबाहिर रहेको उच्च सुरक्षा अधिकारीले बताए । स्रोतका अनुसार घटनास्थलबाट एक माओवादीको शव र एक जिउँदो माओवादीलाइ पक्राउ गर्नुका साथै एक थान हतियार बरामद गरिएको भए पनि माओवादीतर्फ व्यापक क्षति भएको आशंका गरिएको छ । आज बिहानसम्म भिडन्त जारी रहेकाले भिडन्तमा सर्बसाधारणसमेत परेको बताइएको छ । घटनाको पूर्णविवरण आइसकेको छैन ।
