नशा जाँडको आहुँती प्राणको
भनिन्छ अस्तित्व रहेमा संसारको सयर गरिन्छ तर यो तुक नेपालीको हकमा उल्टापर्न गएको पुष्टि गराएका छन् एक नेपालीले । सधै जसो जाँड, रक्सीको नशामा बेसुरिने आफ्नो लोग्नेलाइ जाँड, रक्सी नखान श्रीमतीले आग्रह गर्दा रिसाको झोकमा थानकोट-८ स्थित रामलाल महर्जनको घरमा डेरा गरी बस्ने ४६ वर्षीय विष्णु पाठकले घाँटी रेटेर आत्महत्या गरेका छन् । अघिल्लो बिहान रक्सीले मात्तिएर घर आएका थिए । श्रीमती हेमाले उनलाई जाँड, रक्सी नखान भनेकी थिइन्। पाठकले आवेगमा भान्छाको छुरीले बिहान ८ः३० बजेतिर आफ्नै घाँटी रेटे । परिवारले उपचार प्रयास गरे पनि उनको बेलुकी पाँच बजेतिर निधन भयो।
